十大不滿
- 明明前一日已經訂咗位，當日亦有再打去 confirm，但去到竟然話冇訂座紀錄，而同場亦有唔少人訂咗位但一直未有位坐，呆等至少十幾分鐘。
- 坐低左仲要等執枱，之後又無人 set 枱，要我哋叫先識得比餐牌。
- 午餐有六款主菜，竟然有兩款賣完，另兩款要加錢（$50 or $60），如果唔加就淨係得兩款可以揀。
- 落完 order 坐咗至少十分鐘，一杯水都無，又係要叫先識比。
- 有同事點咗湯但係就比咗叉，又係我哋出聲先知。
- 湯係唔熱嘅，大概同平時食藥飲嘅暖水差唔多温度。
- 叫佢比胡椒粉，又不了了之，後尾係我哋自己去拎。
- 又係要我哋叫先識比麵包，拎到嚟個盤仲熱過個飽（明顯係用微波爐翻叮）
- 麵包聞起嚟有酸味，雖未至於食唔到但好明顯係唔新鮮嘅。
- 我哋四個點咗牛尾，兩個叫咗 Linguine，牛尾嘅份量實在少得可憐，啲肉又硬。配菜啲紅蘿蔔係酸嘅。Linguine 嘅份量亦唔算多，裡面嘅青瓜又係酸嘅。（酸可能係哩間餐廳嘅特色）
- （唉，話唔講都要講埋哩個）送餐飲時，竟然求其將飲管放喺我哋枱面用過嘅餐具上面囉。
人手極度不足，成個場只係得三個人，其中一個外籍侍應仲喺度遊魂。如果啲侍應醒醒目目反應快的話都好啲，但係...唉...
成個午餐冇一樣嘢可以令人滿意，唯一 ok 嘅係個餐飲，因為至少有夠冰凍又好味嘅可樂可以揀...不過，咁嘅價錢，整罐可樂做餐飲都幾冇誠意。
係極度不滿嘅情況底下，我哋都係求其影咗幾幅相。
是次消費每人 $121 。食完仲要唔夠飽，食牛尾嘅同事仲餓到要去 Monster Burger 度買飽食。勁慘！
圖文：髒膠籠
